Laurie skryf:
Een van die hoogtepunte van my 2009 was beslis die goeie energie wat met VuurKairos losgekom het! ‘n Mens kon sien dat daar beslis ‘n behoefte is vir die skep van ‘n ruimte (onder andere in die kuberruim) waar lyf en gees ontmoet, soos wat ons slagspreuk ook sê: Where body and spirit meet. Ons het saam met julle op reis gegaan om te ontdek waar die vuur van ons lywe die vuur van die Gees ontmoet. Ek’s baie dankbaar teenoor Johan dat hy die inisiatief tot die skep van hierdie ruimte geneem het en ook vir al die tyd en energie wat hy in die proses moes insit.
Ons het hoogtepunte gehad en miskien ook ‘n paar laagtepunte. ‘n Paar onderhoude het die lig gesien wat ek dink baie potensiaal vir die toekoms toon. Wat my veral opgewonde maak is ons groot getal bydraers uit verskillende agtergronde wat hulle stemme gebruik het en in die proses sigbaarheid aan ‘n breë solidariteit met mense van lesbiese, gay, biseksuele en transseksuele oriëntasie gegee het. Ons het probeer konsentreer op positiewe beriggewing en wou nie onnodig in skermutselings oor ou debatte betrokke raak nie, maar kon hier-en-daar nie vermy om lesers byvoorbeeld van die verdrukking in ander dele van ons kontinent bewus te maak nie.
Advent is so te sê verby en dit is Kersfees. Die afwagting op die geboorte van die nuwe is oor. Dit bly ‘n misterie dat die deurbraak van die Goddelike op aarde na ons toe kom deur middel van die liggaam van ‘n vrou – deur iets so alledaags soos die geboorte wat ‘n moeder gee. Moederskap is tog doodgewoon vir elkeen van ons, of ons uit ‘n ma gebore is of dalk self een is. Ons heling en bevryding kom nie van outer space nie, maar eerder vanuit die lewe self – vanuit die donker, stilte van ‘n baarmoeder (Lees meer hieroor in Lynn Holnes se Journeying with Mary. Uitgewer: Lux Verbi: 2008).
So van boeke gepraat: As jy op hierdie laat stadium nog opsoek is na ‘n Kersgeskenk of vakansie-leesstof, kan jy onderstaande titels wat vanjaar verskyn het dalk in die hande kry!
Miriam Dans – vroue wat vroue liefhet, Elise van Wyk. Uitgewer: Aqua.
Hijab – Unveiling Queer Muslim Lives edited by Pepe Hendricks for Inner Circle, PO Box 18107, Wynberg 7824.
trans – Trangender Life Stories from South Africa, Ruth Morgan, Charl Marais & Joy Rosemary Wellbeloved. A project of Gay and Lesbian Memory in Action (GALA) and Gender DynamiX. Publisher: Fanele (An imprint of Jacana Media).
Simfonie vir begenadigdes. ‘n Verhaal van hoop vir randmense. Cules Hammann. Uitgewer: Biblaridion.
Groete!
Laurie Gaum
Johan skryf:
Kersfees is een van die seisoene wat duidelik aan ons sigbaar word. Hier waar ek woon, was daar die afgelope paar dae ‘n toestroming van mense na dié vakansiedorpie. Inkopies is gedoen, kersbome is versier, kalkoene is opgeraap, en mense loop sorgeloos op die strande rond – so asof alles wel is.
VuurKairos was die afgelope jaar vir my ‘n persoonlike reis waar selfs ek meer kon verstaan van die groeperings van minderheidsgroepe. In die proses het ek wonderlike mense ontmoet, kon ek interessante gesprekke met individue en groepe voer, is ek na middernag wakker gebel deur iemand wat raad soek of deur ‘n moeilike tyd gaan. Soms was die proses uitmergelend, maar ek het opnuut besef dat ons hier, al is dit in ‘n beperkte maat, mense van hulp kon wees. En daarvoor is ek dankbaar.
Die risiko word altyd geloop dat mens ‘n persoon sal uitlaat wanneer jy aan die einde van die jaar kom, en jy vir mense dankie wil sê. Maar daar is tog ‘n paar wat ek wil uitsonder: Laurie vir sy geduldige oor en nugter wyse waarop hy na my geluister het, en my van raad voorsien het. My “toga-pêlle” wat my die ander gesig van Jesus gewys het: Kobus Bohnen, Barnard Steyn en Willie de Koker. JdV wat, na twaalf jaar, my steeds op my tone hou om dinge anders te sien en objektief teenoor situasies te staan. Die G’s wat vir my ‘n tweede huis geskep het in aanvaarding, en HG wat my hoop gegee het in ‘n gelowige gay persoon. BL wat met sy kinderlike onskuld en eerlikheid my weer laat luister het na iemand 10 jaar my junior. Ook aan my dierbare ouers waar die deure van hulle huis altyd oopstaan vir my en my vriende, ma se kospotte en haar stasoft-beddegoed.
VuurKairos gaan rus tot in 2010. Dankie aan almal wat hierdie jaar ‘n bydrae tot die blog gelewer het met oordenkings en opiniestukke – sonder julle hulp sou ons nie kon funksioneer nie. Bid vir ons waar ons in hierdie tyd herbesin oor hoe om hierdie projek verder van krag tot krag te laat gaan. Julle, ons gewaardeerde lesers en ondersteuners, se raad en insette word altyd waardeer. Kontak ons asseblief by vuurkairos@live.com
As Kersfees ons hierdie jaar kan help om nie op verwagte, vanselfsprekende plekke vir God te soek nie, maar om Hom te ontdek op die onverwagte, menslike en selfs skokkende plekke, dan het ons waarlik die geboorte van Jesus van Nasaret gevier! Dan kan ons weer daardie nag aan sy voete by die krip gedenk.
Ek sluit af met ‘n seëngroet van Kobus Bohnen wat ek vroeër vanjaar geplaas het:
As jy nie kan slaap nie, weet dat God jou op Sy skoot gaan tel hierdie week, en Hy gaan vir jou ‘n wiegeliedjie sing.
As jy onrustig is, weet dat Hy sy hand op jou skouer gaan sit, en jou gaan deel maak van sy ballade.
As jy alleen is, weet dat Hy sy arms om jou gaan slaan, en Hy gaan vir jou die hoogste lied sing van die liefde.
As jy treur, weet dat Hy vir jou gaan troos.
En omdat dit waar is sê ek vir jou:
die GENADE van die Here Jesus Christus,
die LIEFDE van God,
en die SAGTE HAND van sy Gees,
sal met elkeen van ons wees.
